३ साउन, काठमाडौं । एकीकृत नेकपा माओवादीका सचिव सीपी गजुरेलले जारी केन्द्रीय समितिको बैठकले संसदीय दलको नेता परिवर्तन गर्ने दावी गर्नु भएको छ । मंगलबार राजधानीमा आयोजित साक्षात्कार कार्यक्रममा सचिव गजुरेलले अध्यक्ष बाहेकका ६ जना पदाधिकारीबाटै संसदीय दलको नेता बन्ने बताउनु भयो । उपाध्यक्ष डा. बाबुराम भट्टराईको सम्भावना प्रवल रहेको भन्दै उहाँले दलको नेता नै प्रधानमन्त्री बन्ने स्पष्ट पार्नुभयो । जारी केन्द्रीय समिति बैठकको मुख्य एजेण्डा नै कार्यविभाजन भएको उल्लेख गर्दै गजुरेलले बैठकले सरकार र संसदको जिम्मेवारी टुङग्याएपछि मात्रै बाँकी नेताहरुका लागि संगठन, अन्तर्राष्ट्रिय र लडाकूको जिम्मेवारी दिने बताउनु भयो । अहिले पार्टीभित्र सबै जिम्मेवारी अध्यक्षमा मात्र निहीत रहँदा निर्णयहरु कार्यान्वयन हुन नसकेको भन्दै उहाँले मुख्य नेताहरुलाई उचित जिम्मेवारी दिइने दावी गर्नुभयो ।पदाधिकारीको नेतृत्वमा सरकारमा नयाँ टिम पठाउने तयारी भइरहेको भन्दै उहाँले भन्नुभयो-’हामीले मापदण्ड बनाएका तर नेतृत्व र को-को सरकारमा जाने भन्ने विषय टुङग्याइसकेका छैनौं ।’ सचिव गजुरेलले भदौ १४ गतेपछि प्रधानमन्त्री झलनाथ खनालले माओवादी नेतृत्वको सरकार निर्माणका लागि राजिनामा दिने सहमति पहिला नै भएको दावी गर्नु भयो । उहाँले भन्नभुयो-’भदौ १४ गतेपछि माओवादीको नेतृत्वमा सरकार बन्ने पहिला नै सहमति भएकोले पनि माओवादीले सरकारको विरोध नगरेको हो । झलनाथजीको पालो पुग्यो, अब हाम्रो नेतृत्वको सरकार बन्छ ।’ माओवादी र एमालेबीच भएको सातबुँदे सहमतिमा आलोपालो गर्ने उल्लेख रहेको भन्दै उहाँले भदौ १४ गतेपछि प्रधानमन्त्रीले राजीनामा दिने स्पष्ट पार्नुभयो ।
No comments:
Post a Comment